مراحل الحزن أو التقبل الخمسة: هي مراحل يمر بيها كتير من الأشخاص لما بتحصل لهم صدمة أو مصيبة...
مثال: موظف زميله أخبره إن الشركة قللت عدد الموظفين، علشان كده هيتم تسريحه أول الشهر الجديد.
[size=16]حسب نموذج كيوبلر روس، المراحل الخمسة الي هيمر بيها هي:
[/size]
[/size]
١- الإنكار: من الصدمة هينكر إن حاجة زي دي ممكن تحصل، وهتلاقيه يقول حاجات زي: (أكيد زميلي كان بيهزر، مستحيل يمشوني، دا انا ماشي كويس من يوم ما اتعينت، أكيد كان بيضحك علي)
٢- الغضب: بعد شوية تفكير هيبدأ يتعصب، وتلاقيه بيقول حاجات زي: (هما ازاي يعملوا كده؟! دا انا أحسن موظف في الشركة، أنا هروح للمدير مكتبه وأهزئه أدام الموظفين علشان يعرف انا مين)
٣- المساومة: بعد شوية بيهدى، ويبدأ يفكر في طريقة يحافظ بيها على وظيفته بأي شكل، فتلاقيه مثلا يفكر: (أنا هروح لمحمود الي شغال في التسويق، هو عارفني وممكن يتوسط لي عند مجلس الإدارة، وممكن اخد معايا هدية للمدير كمان)
٤- الإكتئاب: في المرحلة دي الموظف بيكون أدرك إنه كده كده هيمشي مهما حاول، وان القرار خلاص صدر، فبيخش في حزن مبالغ فيه، وتلاقيه يقول حاجات زي: (طب لو مشيت من هنا هروح فين؟! هصرف على البيت منين؟! هقول ايه لصحابي لما يعرفوا؟! حياتي كلها اتدمرت خلاص)
٥- التقبل: في المرحلة دي أخيرا بيكون الشخص تقبل المصيبة، وتلاقي أعصابه هديت شوية، وبدأ يفكر: (قدر الله وما شاء فعل، هبدأ ادور على شغل؛ أنا الحمد لله عندي خبرة كويسة وأكيد هلاقي شغل بسهولة)
طبعا المراحل دي مش بتتطبق مع كل الناس؛ فمثلا المؤمنين إذا أصابتهم مصيبة قالوا إنا لله وإنا إليه راجعون من غير ما يعمل كل الدراما دي، ولو مثلا شخص قوي هيكون موقفه مختلف شوية، لكن النموذج ده ممكن يتطبق على الأشخاص عديمي الحيلة.
.
الخلاصة: المراحل الخمسة للحزن والخسارة حسب نموذج كيوبلر روس:
الإنكار - الغضب - المساومة - الإكتئاب - التقبل
((إن الإنسان خلق هلوعا، إذا مسه الشر جزوعا، وإذا مسه الخير منوعا...إلا المصلين...))...سورة المعارج
حد يعرف يمثل النموذج على طفل عرف ان ابوه وامه هيطلقوا
شارك الموضوع
