بالنسبه ياجماعه لموضوع الدواجن . في منها تسمين وفي بياض . التسمين دي لانتاج اللحم . ودي اللي احنا هنتكلم عنها دلوقتي . في ابيض وده منه ( الكب . الهبرد . الروص . ايفين . ٠٠٠٠ ) وكل نوع وليه مميزاته . وفي ساسو وده منه ( جيل اول - تاني ).
باختصار الموضوع كله عباره عن كتكوت عمر يوم . درجات حراره . تهويه . علف . ومتابعات . ازاي الكتكوت عمليا بياكل حوالي من ٣ ل٤ كيلوا ويديك حوالي من كيلوا ونص ل٢ ونص حسب نوع الكتكوت يعني الابيض مثلا ياكل ٣ كيلوا يحول ل كيلوا و٨٠٠ جرام متوسط للعنبر كله . الساسوا لو كل ال ٣ يحول لكيلوا و٦٠٠ لو جيل اول . بالنسبه للدوره الكامله بتكون من ٣٢ يوم الي ٤٥ يوم حسب الوزن اللي انت عايزه .
في ٥ تحصينات اساسيه . (جمبورو . هتشنر . لاسوتا . انفلونزا . ib ) الكتكوت بيحتاج درجات حراره من اول ٣٥ درجه او ٣٣ او ٣٢ حسب انت عايز تطلع الفرخ وزن ايه وتمشي معاها بمعدل لحد ما تلاقيها ٢٨ في نهاية الدوره .
في امراض بتقايلك ديما زي الكوكسيديا والسموم الفطريه وغيرها . الموضوع سهل بس بالتعود والفهم والمتابعه اللي هكون معاك فيها يوم بعد يوم . طبعا كل اللي قلته ده كلام عام طبعا .
العشر كتاكيت بيحتاجه مساحه متر مربع متوسط ممكن يبقى ١٢ في المتر لو مش هحتاج الوزن عالي وممكن يبقى ٨ في المتر . سعر الكتكوت ده بورصه وافضل اماكن ممكن تجيب منها الكتكوت . شركة الوطنيه . الوادي . عبد السلام حجازي . والبنا . والحاج صلاح عطيه رحمه الله وده استاذي اللي انا اتعلمت في مزرعة الارض المباركه بتاعته .
طبعا في اعلاف كتيره ممكن تستخدمها بس اهم حاجه تعرف عيب العلف وتستخدم برنامج وقائي مثلا لو السموم فيه عاليه تستخدم مضاد سموم وهكذا اهم حاجه يكون البروتين مظبوط لان ده التحويل الاساسي للكتكوت في اول دورته والطاقه في اخر الدوره مع البروتين طبعا بس بيكون قليل شويه . طبعا كل عنبر وليه حالته لانه مش شئ محفوظ وشكرا
شارك الموضوع
